أنا و أختى المنقبه

أختى المنقبه قررت بكيفها.. و لما لقت نفسها قريبه من بيتنا بعد ما خلصت من جوله التسوق.. قررت إنها تزورنا .. لا خبر لا مقدمات لا عمات عين.. بس حابه إتطب علينا مثل القدر المستعجل وتضيع شويه وقت.. الظاهر بعلها راح يتأخر بالدوانيه.. حتى و لا رنه تلفون تخبرنا بقدومها الميمون.. المهم وصلت البيت و طقت الجرس و أنا و زوجتى قاعدين نسولف و مولعين الشموع و مشغلين موسيقى وأخر إنسجام

أكيد الجيران لما شافوها عند بابنا شكوا.. أكيد فى شئ غلط.. يا إنها مضيعه البيت و طاكه بالغلط.. أو إنها و حده من ها الطرارات المنقبات تعمل جوله هبش جيوب الرييايل اللى فى الفريج.. وتدلع عليهم شوى وتاخذ المقسوم و لو طلعلها وحده من النساء تقلب مسكينه.. و خصوصا كنا بأخر الشهر.. مو متعودين الجيران يشوفون هاكذا نوعيه من البشر تعدى على بيتنا..
قلت لزوجتى.. منهو ها القثيث اللى يطق على بيتنا بها الوقت المتأخر.. رحت فتحت الباب.. ولما شفت ها السواده قدامى والدنيا ساعتها ظلمه.. فزيت.. و رجعت وراء شوى و كأنه عتوى أسود توه فاحص و مرتفع عنده السكرى طالعلى من تحت الساس.. ولما إستوعبت الموقف قلتلها فوراً وبعصبيه الله يعطيج.. و سكرت الباب بسرعه
فرن الجرس مره ثانيه.. طلعلتلها و أنا متنرفز
- اخرتها و ياج مو قلتلج الله يعطيج.. بعد شتبين فى أحسن من عطايا ربنا
- ويه.. ليش ما عرفتنى.. أوه.. أنا أختك.................
- أووف..شنه.. أوه.. سامحينى علبالى طراره غثيثه.. و بعدين شلون تبينى أعرفج و مو مبين منج إلا عيونج وهم بعد سود يعنى ظلمه بظلمه.. شتبيييــن .. أووه!! أسف.. قصـــدى تفضلى
- ضحكت و قالت.. انا طراره.. ما تستحى .. زوجتك كاعده الحين
- إيه كلنا كاعدين.. تفضلى ودخلت بيتنا لأول مره
و يا للهول!! ويا للمصيبه!! عيونها فجأه تلاعبت يمين و شمال ورفعت يديها و صرخت و كأن عقرب متعافى قارصها
- شنه هذا .. شنه هذا..... (بصراخ)
- فزيت .. شنه خير.. البارح مبخرين البيت
- الله أكبــــــر .. تماثيل بكل مكان.. وصور معلقه.. و موسيقى شغاله ياالكافر.. واواواوا.. أنا و ين.. ببيت نصرانى و إلا يهودى
- الله .. ليش شنه السالفه .. واحد من الجن طلعلج وإلا شنـــــــــــــه
زوجتى الخجوله عرفت المقصود و قالتلها فورا .. هلا يا فلانه.. ترى مافيه شئ .. شغلات بسيطه
- وبنهره قالت - بسيطه شنه.. ما تخافون ربكم.. تبونه يخسف فيكم.. تبونه يفقركم.. تبون دشون جهنم و بئس المصير
رديت عليها
- خير ربنا اليوم معادينا ليش.. إحنا زعلانه بشئ.. ما قلنالج البارح وربج مبخرين البيت
- زعلتوه ونص.. ماتشوف كل ها الحرام اللى ببيتكم صور بشر فيها روح.. لا.. متعلقه بكل مكان.. الله أكبر و تماثيل.. شنه حاطينهم تعبدونهم..الله أكبر عليكم.. و مشغلين موسيقى .. يله طفوه بسرعه
طبعا زوجتى صابتها الخرعه كالعاده وخافت من صوت إختى المنقبه العالى..وهى توعد وتهدد بالويل و الثبور.. و ركظه سكرت التسجيل و رجعت كأنها مو مسويه شئ
قلتلها- بس ها الأشياء ديكور و شغلات إحنا نحبها و جامعينها من كل مكان وصارفين عليها عدل.. شنه مشكلتها مع ربنا
-مشكلتها إنها حرام.. ما يجوز .. الدين نهى عنها.. مطاوعتنا حذرونا من ها الأشياء ملت الكفار.. هذا كفــر

- ليه يا إختى.. لايكون متحف اللوفر جان فجرتيه عيــل.. شويه صور و جم تمثال مزعلين الدين بشنه.. يعنى طول اليوم تبينا نطالع طُوف (جمع طوفه) فاضيه.. شنه مقيمين بالسجن المركزى
-متحف شنه.. خلك من ها الخرابيط.. يا أخى حطلك شويه لوحات فيها ذكر الله إذا كلش متأزمه معاك.. و أرخص من ها اللوحات اللى تغضب الله و تلاقيهم بها الأسواق الشعبيه مكططين
-والتماثيل
- كسرهم .. لا ييلك يوم تعبدهم.. إستغفر الله.. أعوذ بالله
- والله.. إنت من صجك.. فيه أحد عاقل أو حتى مجنون يعبد تماثيل الحين.. هذا خبرج قبل لما كان أهل قريش عايشين بخيام هم و الغنم ..الدنيا تغيرت.. و يمكن المساكين حاطينهم لتزيين ديرتهم.. إحنا شدرانـــا
جان زوجتى المسكينه تتدخل بعد ما لقت نفسها بمشكله و يالها من مشكله.. ما تدرى شتسوى.. شلون تلم الموقف.. العمليه جاتها على غفله.. مو مستعده.. وقالتلها
- زين على الأقل إستريحى .. قعدى.. أجيبلك شاى و إلا قهوه
النكته ساعتها حكمت وقلت
- لا هاتيلها بيــــره .. بس تأكدى إنها مالت الجمعيه مو متهربه علشان لا تزعل
نظرت لى نظره (خنطريسيه) * بمعنى من كل الألوان و الملل* و قالت
- أنتم أصلا الشيطان ساكن بيتكم وأكيد ما فيه بركه
شكلها مصختها.. هذا بقلبى و قلت
- وينه ها الشيطان.. و لا عمرى شفته.. خبرينى إذا إنت شايفته خلينى أكسر راسه الحين
- تتطنز .. إنت فيك بلا.. لازم تشوف مطوع
- أنا للحين ما شفت من ها الشيطان أى أذيه.. عيل متحف اللوفرأحسنله يسكر.. تلاقين الشيطان العود مالهم وربعه معششين هناك
- شنه لوفر و خوفر .. عن ها الخرابيط وتكلم عدل
- إنت الحين بالضبط شتبين.. أكيد بعد نكسر التلفزيون لأنه حرام.. و نبيع الثلاجه و الطباخ لأنهم صناعه الكفار.. ونقعد على باب الكريم
- شوف عاد.. أى نعم التلفزيون ما يجوز بس حلال لو بس برمجته على القنوات الدينيه.. لا يكون ولدك يطالع ميكى ماوس .. هذا حرام.. المطاوعه حذرونا.. عسى الله بس يهديكم.. انتم محتاجين مطوع يفهمكم الدين عدل
- والثلاجه.. ترى صانعينها الكفار.. و ياليت التكييف بالمره.. تبينى أصعد السطح أكسر المكاين.. و ياريت المطوع مالج بعد ينفغ مكان التكييف.. علشان يبرد علينا
خلاص مه شفت إن السوالف معاها بجد ما تييب نتيجه.. خلينا نشوف أخرتها معاها
- الله يهديك.. وشدخل الثلاجه و التكييف
- لا يا أختى ما يجوز.. ما تدرين إن اللى صانعه كافر.. ياريت بالمره دلينا على محل يبيع ثلاجات إسلاميه.. بارك الله فيك
- هم ها الكفار الله مسخرهم لنا علشان يتعبون وحنا بالمستريح نشتريها منهم
- ها.. تصدقين مادريت.. جزاك الله خيرا.. الحين فعلا عرفت سبب تخلفنا.. والله عندكم جواب لكل شئ.. جاهزين.. يعنى إحنا ننبطح و هم يشتغلون.. وهما يبيعون و حنا نشترى عالجاهز.. و الله منطق و تحليل خطير كان غايب عن بالى
- شنه.. ما فيه شئ.. هذول الكفار كاتب الله عليهم الشقا *(الشقاء)
*
-و إحنا كاتب علينا الإنبطاح.. يا أختى إرحمينا .. إحنا عاجبنا حياتنا جذيه.. ليه هو ربج ماعنده شئ أهم من إنه يشغل نفسه بشويه تماثيل وصور بيبتنا.. ليه هى الحياه لازمها نكد حتى ما نسمع موسيقى.. ليه الموسيقى ضارتكم بشنه حاطين دوبكم و دوبها.. ما تركزون على شئ مفيد بالهدنيا بدل ما إنتم ملاحقين خلق الله تحرمون و تححللون بكيفكم وتخوفون خلق الله.. إحترنا معاكم.. و بفتاويكم اللى مسلطينها علينا كل شوى و ملخبطين حياه الناس هذا يفتى و الثانى المتخلف صاحبه يفتى فتوى تناقضها.. الناس خلاص ما عادت تستحمل..التلفزيون حرام.. صوت المرآه حرام .. خروج المرآه حرام.. كره القدم حرام.. صالون الحلاقه حرام.. لبس البنطلون حرام.. الأعراس و الأفراح حرام.. الضحك حرام.. كل شئ يونس بالدنيا حرام.. إحنا عيل ليه عايشين مانموت أحسن إذا كل شئ حرام.. و ياريت إنتم مسوين شئ فى ها الدنيا و العالم مستفيده منه أو على الأقل إحنا مستفدين منه.. يامفجرين ياحارقين يا منتحرين ياشاتمين.. شغلكم كله دمار بدمار وخراب ديار . نفسى أشوف شئ سويتوه نفتخر فيه و على الأقل نحترمكم عليه .. غير الدمار و النهى و تكفير خلق الله.. شنه عندكم.. ما عندكم الا ما عند إبوى..إنتم أصلا بحايتكم و معيشتكم و رزقكم ومماتكم معتمدين على ها اللى تسمونهم كفار و إلا صارت حياتكم الحين مثل جماعه قريش حبايبكم.. و فوق هذا ما تشكرونهم.. مو لازم الشكر.. على الأقل ما تشتمونهم ليل و نهار و تدعون عليهم بالفناء وخراب الديار و أولادهم يتيتمون..يامرضى..ميتين حيل على الجوارى.. وإلا شنه.. يعنى شنه عندكم بديل..عطونا بديلكم المعجزه.. راح تعالجون ها الأمراض بتفال مطاوعتكم.. راح تكيفون بيوتنا بنفاخ شيوخكم.. راح نتنقل على بعارين و إلا على سجادات مطاوعتكم..مو هُم ها الكفار بشر مثلنا و عايشين فى سلام مع نفسهم و مع العالم المحيط فيهم... شتبون فهمونى.. تبون تبيدون ها العالم علشان تقعدون على خرابه.. و شنه البديل عندكم .. لا علم.. لا صناعه.. لا تكنولوجيا.. لا سياسه.. لا حتى أخلاق ولا نظام.. لا عمات عين.. على شنه نتبعكم فهمونى.. أنا عايش بسلام و صاك بيتى .. و لانى مأذى أحد.. على شنه أدخل النار و جهنم و بئس المصير.. شنه الجريمه اللى سويتها.. لهدرجه حياتنا تافهه عند ربكم.. ما أعتقد ربنا بهذه الهيافه.. هو أعظم من فكركم المريض.. لوعتوا جبودنا.. حولتونا لدول متخلفه..كسالى إتكاليين.. ما تشوفون الهند و الصين و كوريا و ين وصلوا و وين إحنا ..اللى على طول تعيبون عليهم.. وتقولون عنهم عباد البقر..يعنى إنتم منه.. وأنتم للحين مشغولين شلون تأذون خلق الله بفتاويكم الهايفه من بول البعير لغايه رضاعه الجبير.. يعنى بالذمه شنه أهميه ها الفتاوى.. راح توصلنا المريخ.. راح تخلينا فوق الريح.. ليه ما تريحونا و تنجبون و تسكتون.. بس هذا الطلب نبيه.. مو وايد.. و إلا حابين تتحكمون بخلق الله .. شنه لها الدرجه عندكم نقص.. ما تتشطرون إلا علينا.. ما قدرتوا تنافسون الغرب بعلومه.. ولا بسلاحه..حتى بكره القدم فاشلين.. ما أدرى على شنه أنتم أكرم أمه.. بلحاياكم و نقابكم.. هذى أصلا أكبر تكنولوجيا فاشله عندكم.. يا عِره الشعوب.. عندكم غيرها.. مو أبى أفهم.. بالضبط شتبون... شتبون..فهمونا.. ترى دو ختونا معاكم ومع هيافتكم.. تبون تحطون خليفه منكم .. نتبعه مثل الغنم.. وتضربونا بالخيازرين..وتراقبونا داخل بيوتنا.. و ترجعونا لأيام داحس و الغبرا.. و إلا شنه.. محنا شايفين بلاويكم.. تقطعون رقبه المساكين كأنكم مقطعين خياره..لاحس لا إنسانيه.. حامض على بوزكم.. ما راح يصير و لا راح يصيـــر.. إنتم لو إستلمتوها أصلا راح تدمرونها .. و راح تفقرونا و ترجعونا ورا.. مو الشيطان .. لأن الشيطان بس معشش بعقولكم المريضه.. وبنفوسكم الفاسده
..
زوجتى فجأه صرخت بكل قوه صرخه مبهمه وبهستيريا و راحت للتسجيل و شغلت الموسيقى باعلى صوت وكأنها تتحدى.. إستغربت تصرفها هذا.. مو عادتها.. هذى طول عمرها مسالمه و بالذات معاهم.. تتفادى شرهم.... شلى حصل.. من و ين ياتها روح التحدى .. وقدام منه .. قدام أعتى عتات التخلف.. ووقفت زوجتى فى نص الصاله و هى تنظر لأختى بتحدى وكانها تقولها ياالله تعالى أبي أشوف شراح تسوين..شغلت الموسيقى و بأعلى صوت غصب عن تحاريمج وعن مطاوعتج

فجأه..أختى المنقبه .. تغطت..و خذتها من قاصرها بعد ماسمعت ها المحاضره من لسانى السليط.. و نظرات زوجتى اللى كلها تحدى وشرر.. وشكلها اختى المنقبه قالت .. هذول مو ربعى.. هذول مو منا.. هذول غير..أكيد الشيطان راكبهم.. خلنى أطلع بسرعه لا أصير مثلهم

بعد ما طلعت. شفت زوجتى تهتز.. و كل شئ فيها يتنافض .. ومتخشبه كأن ما فيها نقطه دم.. قربت منها و أخذتها بحضنى.. عسى بس أقدر اهديها.. بكت و بكيت معاها على حالتنا و حاله مجتمعنا.. و على التردى اللى إحنا فيه.. صرنا غير.. حتى إخوانا صاروا مو إخوانا..و يومها ما شفنا ريحه النوم وشموعنا ذبلت و موسيقانا طفيت


وفكرت بعدها.. هذى هى أختى اللى الحين صارت منقبه.. هذى أختى اللى أذكرها من أيام إمتحانات الثانويه و لما كانت مراهقه.. كانت تلبس ملابس المدرسه القصيره وقميص أبيض بنص جم.. بدون حجاب.. هذا أصلا العادى.. أصلا كل بنات الكويت كانوا جذيه.. و ما حد كان مستغرب.. محد كان محرم..شلى قلبها وغيرها.. شلى أصلا قلب ها المجتمع و صار غيــر هذاك المجتمع المسالم اللى أعرفه و اللى عايش حياته بسلام و محبه..شلى قلبه من البياض للسواد حتى لبسه صار أسود مظلم مثل تفكيرهم.. كانت حياته بدون تحريم و لا نواهى و لاحتى فتاوى.. كانوا عايشين على الفطره نحب العالم و يبادلنا العالم نفس الحب.. يسمعون اغانى فيروز و عبدالحليم.. ويشوفون الأفلام العاطفيه..أختى كانت أصلا تحب فيروز..أغيتها المفضله.. حبيتك بالصيف حبيتك بالشتا.... ليه.. كله منهم الله لا يبارك فيهم.. قلبوا ها المجتمع و غيروا أختى.. خوفوها من جهنم و من عذاب القبر ومن الثعبان الأقرع وحتى من سماع فيروز.. خوفا من الرصاص اللى راح ينصب باذنها.. وغسلوا مخها وصارت تفكر شلون بس ترضى ها المطاوعه .. علشان ربها يرضى عليها و ما يدخلها جهنم و بئس المنتهى و المصير.. وكأنهم و كلاء عن الخالق..صدقتهم المسكينه وأمنت فيهم.. وكذلك مسكين هذا الشعب.. اللى صار يصدق خزعبلات ناس و صوليين باحثين عن السلطه و المال وحالمين بالخلافه و ايام الأندلس و دوله هارون الرشيد و يبون صلاح الدين يحرر لهم القدس.. بس بدون لا يتعبون نفسهم ولا يفكرون.. وكرهوا العالم فينا.. وخوفوهم منا.. وجعلوا منا إرهابييين..عملوا لها الديره غسيل مخ بالترهيب و التخويف والوعيد والتهديد.. مو حاقد على أختى المنقبه بل أسف على الحاله اللى و صلت لها.. و أصبحت حياتها كلها رعب وخوف وظلام ونكد.. حتى لبسها صار أسود.. مشغوله بيومها بس بين الحلال و الحرام وإرضاء سلاطين و مطاوعه أخر زمن.. فعلا مسكينه أختى المنقبه